Kryeministri në detyrë i Kosovës, Albin Kurti, fitues i zgjedhjeve të 28 dhjetorit ka thënë se po bëjnë përgatitje për formimin sa më të shpejtë të Qeverisë së re.
Ai ka thënë se janë disa marrëveshje dhe buxheti për vitin 2026 që duhet të miratohen sa më parë në Kuvend.
“Ne po përgatitemi që së pari ta konstituojmë Kuvendin dhe sa më shpejt ta formojmë qeverinë, sepse, siç e dini, kemi tri marrëveshje ndërkombëtare me Bankën Botërore dhe njëkohësisht e kemi edhe planin e rritjes me Bashkimin Evropian, që është 882.6 milionë euro dhe që duhet sa më parë ta miratojmë në Kuvendin e Republikës, pa harruar që kemi më së shumti përgjegjësi, obligim, por do të thosha edhe preferencë, e ky është buxheti për vitin 2026. Ju e dini që me 1/12 qeveria në detyrë mund të vazhdojë veç edhe për muajin shkurt, për muajin mars nuk mund të vazhdohet kësisoj. Andaj, në muajin shkurt duhet ta kemi të përmbyllur edhe çështjen e buxhetit”, tha Kurti në një deklarim për media në Podujevë.
Sa i përket përbërjes së kabinetit të ri qeveritar, ai tha se nuk do të ketë shumë ndryshime nga ai që kishte propozuar.
Kurti është pyetur edhe për çështjen e zgjedhje së presidentit të ri, ku është shprehur se edhe kjo do “ecë barë e mirë”./teve1.info/
