Kryeministri në detyrë i Kosovës, Albin Kurti, ka dhënë detaje nga takimi me ministrin e Deleguar për Evropën të Republikës Franceze, Benjamin Haddad, duke bërë të ditur se gjatë vizitës së tij janë nënshkruar pesë marrëveshje mes Kosovës dhe Francës.
Sipas Kurtit, marrëveshjet e arritura thellojnë bashkëpunimin dypalësh në disa fusha kyçe, përfshirë drejtësinë, investimet infrastrukturore dhe arsimin.
“Vizita e sotme e ministrit Haddad vjen në vazhdën e drekës së punës që zhvillova me presidentin Emmanuel Macron më 17 mars në Pallatin Elize dhe të angazhimit tonë të përbashkët për forcimin e marrëdhënieve ndërmjet dy vendeve. Sot, ky angazhim u konkretizua me nënshkrimin e pesë marrëveshjeve ndërmjet Kosovës dhe Francës”, ka shkruar Kurti në Facebook.
Ai bëri të ditur se Marrëveshja për ekstradim dhe Marrëveshja për ndihmë të ndërsjellë juridike në çështjet penale synojnë forcimin e bashkëpunimit ndërmjet institucioneve të drejtësisë në luftimin e krimit dhe sigurimin e llogaridhënies.
Ndërkaq, sipas tij, marrëveshja për kredi në vlerë prej 60 milionë eurosh dhe themelimi i Komitetit Francë–Kosovë do të mbështesin investimet infrastrukturore, përgatitjet dhe organizimin e Lojërave Mesdhetare Prishtina 2030, si dhe trashëgiminë e tyre afatgjatë.
Kurti theksoi se marrëveshja administrative për mësimdhënien e gjuhës frënge do të zgjerojë mundësitë për mësimin e kësaj gjuhe dhe do ta afrojë më tej Kosovën me hapësirën frankofone.
Ai njoftoi gjithashtu se në takimin me Haddad kanë diskutuar për integrimin evropian të Kosovës, sigurinë rajonale, bashkëpunimin ekonomik dhe thellimin e partneritetit dypalësh.
“Ia kërkova mbështetjen e Francës për avancimin e Kosovës drejt anëtarësimit në Bashkimin Evropian, në NATO dhe në organizata të tjera ndërkombëtare”, u shpreh Kurti.
Në fund, kryeministri në detyrë falënderoi ministrin francez për vizitën dhe angazhimin e tij në avancimin e marrëdhënieve mes dy vendeve.
“Marrëveshjet e nënshkruara sot dëshmojnë se partneriteti ynë po shndërrohet gjithnjë e më shumë në projekte, investime dhe rezultate konkrete për qytetarët e Kosovës”, përfundoi ai.
