Kryeministri i Kosovës, Albin Kurti, ka përkujtuar viktimat e masakrës në Lybeniq të Pejë, në 27-vjetorin e ngjarjes tragjike, ku dhjetëra civilë shqiptarë u vranë nga forcat serbe gjatë luftës në Kosovë.
Përmes një postimi në Facebook, Kurti ka theksuar se drejtësia për këtë krim në Serbi është zvarritur dhe mjegulluar, duke e cilësuar atë si një drejtësi të cunguar.
“Më 1 prill të vitit 1999, në agimin e një dite pranvere, forcat e armatosura të Serbisë rrethuan fshatin Lybeniq të Pejës. Në orën 07:00 të mëngjesit, pjesëtarë të njësitit “Çakejt”, në kuadër të njësitit “177” të ushtrisë jugosllave, bashkë me pjesëtarë të njësitit ushtarak të Mbrojtjes Territoriale, e sulmuan fshatin, me një plan të errët shfarosjeje. Brenda pak çastesh, banorët u dëbuan nga shtëpitë e tyre, u mblodhën në mes të fshatit, pranë xhamisë. Gratë, fëmijët dhe të moshuarit u ndanë dhe u dëbuan, ndërsa 59 burrat u vranë me rafalë të pandalshëm armësh automatike. Në Serbi, drejtësia për këtë krim është zvarritur dhe mjegulluar, një drejtësi e cunguar në një shtet gjenocidal. Por përballë mohimit të tyre, qëndron e vërteta jonë. Përballë errësirës së djeshme, sot qëndron Kosova e lirë, demokratike që po punon të anëtarësohet në Bashkimin Evropian dhe në NATO”, ka shkruar Kurti.
Kryeministri ka shtuar se Serbia, duke refuzuar të përballet me të kaluarën, mbetet peng i saj dhe e ka cilësuar atë si vend ku, sipas tij, vazhdojnë të mbrohen kriminelët e luftës.
Ndërkohë, ai theksoi se Kosova po forcohet çdo ditë në të gjitha fushat, përfshirë mbrojtjen, sigurinë dhe drejtësinë.
Kurti nënvizoi rritjen e numrit të hetimeve dhe gjykimeve për krime lufte, si dhe angazhimin institucional për dokumentimin e tyre.
“Shteti ynë u qëndron pranë familjeve të dëshmorëve dhe martirëve përmes përkushtimit institucional, përfshirë Ministrinë për Punë, Familje dhe Vlerat e Luftës Çlirimtare. Nga një vend i shkatërruar nga lufta, sot kemi një shtet që krijon mundësi dhe që u jep shpresë brezave të rinj. Kjo është dëshmia më e madhe se sakrifica e martirëve u shndërrua në liri, në zhvillim dhe në një të ardhme më të ndritur për të gjithë”, ka përfunduar Kurti./teve1.info/
