Në përvjetorin e 26-të të rënies së Agron Rrahmanit dhe Bahri Fazliut kryeministri në detyrë, Albin Kurti ka thënë se vrasja e tyre ka qenë goditje shumë e madhe për luftën çlirimtare të Kosovës.
Kurti është shprehur se Agroni dhe Bahriu ishin të pandashëm nga ideali i tyre patriotik andaj sipas tij ata nuk i ndau as vdekja dhe sot nuk mund ta kujtohet njëri, pa u kujtuar tjetri.
Ai ka shtuar se dëshmorët e kombit e përbëjnë historinë e lavdishme të Kosovës, ndërkaq kujtimi dhe besnikëria ndaj tyre e ndriçon rrugën drejt mbrojtjes të atdheut.
“Agron Rrahmani u vra pesë ditë pas Bahri Fazliut dhe tre ditë pas Ilir Konushevcit. Vrasja e këtyre heronjve të popullit, të luftëtarëve të paepur, të njerëzve aq të dashur e të veprimtarëve intelektualë ka qenë goditje shumë e madhe për luftën çlirimtare të Kosovës. Agroni dhe Bahriu ishin moshatar. Të dy lindën në vitin 1971. Ata ndanë jo vetëm vitin e lindjes, por edhe vitin e rënies. Të pandashëm nga ideali i tyre patriotik, ata nuk i ndau as vdekja. Sot nuk mund ta kujtojmë njërin, pa e kujtuar tjetrin. Dëshmorët tanë të kombit e përbëjnë historinë tonë të lavdishme, ndërkaq kujtimi ynë për ta, besnikëria jonë ndaj tyre, na e ndriçon rrugën përpara në mënyrë që të ecim edhe me mbrojtje të atdheut, edhe me demokraci në institucione, edhe me progres për shoqërinë, edhe me zhvillim për ekonominë tonë, për këtë brez dhe për brezat që do të vijnë. Lavdi Agron Rrahmanit dhe të gjithë dëshmorëve e martirëve të kombit shqiptar”, ka shkruar Kurti në Facebook./teve1.info/
