Kryeministri i Kosovës, Albin Kurti, në mbledhjen e parë të Qeverisë Kurti 4 ka folur për vendimin që pritet të shpallet më 16 shtator në Gjykatën Speciale, në rastin ndaj ish- krerëve të UÇK-së Hashim Thaçit, Kadri Veselit, Rexhep Selimit dhe Jakup Krasniqit, të cilët po akuzohen për krime lufte dhe krime kundër njerëzimit.
Kurti tha se uron që drejtuesit e UÇK-së të kthehen në vendin e tyre dhe pranë familjeve të tyre.
“Për ne është gjithçka e qartë, rezistenca dhe lufta jonë ka qenë e drejtë, çlirimtare dhe kundrejt një pushtuesi, i cili kreu krime lufte dhe krime kundër njerëzimit dhe gjenocid. Besojmë e urojmë që edhe verdikti i së mërkurës të jetë në përputhje me këtë të drejtë dhe drejtuesit e UÇK-së të kthehen në vendin e tyre, më pranë familjeve”, u shpreh Kurti në mbledhjen e Qeverisë.
