Kryeministri i vendit, Albin Kurti ka vlerësuar se në të kaluarën punimi i rrugëve është bërë me plane të dobëta dhe se ka pasur përgatitje të pakta. Ndërsa sipas tij, pas ardhjes në pushtet të kësaj qeverie, rrugët po punohen me plane të hollësishme dhe sipas ligjit.
“Në të kaluarën ka pasur plane të dobëta, përgatitje të pakta e zvarritje të gjata. Tash me qeverinë tonë ne kemi shumë përgatite, plane të hollësishme, andaj edhe punët janë të rregullta sipas procedurave e ligjit”, ka thënë ai.
Këtë deklaratë ai e dha sot, kur bashkë me ministrin e Mjedisit, Planifikimit Hapësinor dhe Infrastrukturës, Liburn Aliu, vizituan vendpunimet e rrugës Prishtinë –Mitrovicë.
Nga atje, Kurti uroi qytetarët duke u zotuar se do të përpiqen që punimet të shkojnë shpejt.
Kryeministri po ashtu, njoftoi se punimet po kryhet nga një kompani kosovare e një bullgare, ndërsa po mbikëqyren nga një austriake.
“Kjo pjesë dihet që ka një dendësi të trafikut dhe është një lajm i mirë për të gjithë qytetarët e Prishtinës, Mitrovicës dhe më gjerë se kaq, meqenëse kjo bëhet pjesë e lidhjeve shumë më të mëdha rajonale. Sigurisht që është një ditë e mirë, kompania nga Kosova e kompania nga Bullgaria punojnë bashkë, ndërkaq mbikëqyren nga Austria. Andej të gjithë qytetarëve të Republikës, jo vetëm të kësaj zonë këtu, urime e përgëzime. Do të përpiqemi që punimet të shkojnë mbarë, mirë dhe shpejt”, u shpreh ai.
Në anën tjetër, ministri, Aliu tha se po krijojnë kushtet që punimet të kryhen brenda afatit dhe të kenë cilësinë e duhur.
“Qytetarët kanë të drejtë që janë skeptik. Sistemi i përgjithshëm i inspektimit të rrugëve dhe ndërtimit të tyre ka qenë jo i rregulluar mirë në vendin tonë. Ne kemi insistuar që të kemi sistem që krijon kushte që punët të kryhen brenda afat dhe punimet të kenë cilësinë e duhur”, tha ai.
