Kryeministri Albin Kurti ka kujtuar politikanin dhe veprimtarin e çështjes kombëtare, Hasan Prishtinën, në 90-vjetorin e vrasjes së tij.
Kurti ka përmendur pjesë të një fjalimi që Hasan Prishtina e kishte thënë në varrimin e Luigj Gurakuqit. Sipas Kurtit ato fjalë mund të lexohen sot me po të njejtën vërtetësi edhe për vetë Hasan Prishtinën.
“O Gurakuq, me trup me të vërtetë vdiqe, por me emër jo kurrë, se emri yt është shkruar në zemrat e shqiptarëve të vërtetë dhe historia e Shqipërisë emrin tënd do ta shkruajë me shkronja të arta! Qoftë mallkuar ajo dorë e ndyrë që të vrau! Ndofta edhe prej nesh do të vriten, por të siguroj se idealin tënd asnjë forcë nuk do të mundet të na e shuajë ose të na e pakësojë. Në këtë mënyrë tradhtarët duhet ta dinë se do të na shtojnë e forcojnë parimet e tua të shenjta. Do të vijë një ditë që monumentin tënd do ta ngrehim në Shqipëri, atë ditë na e tregon gjaku yt i derdhur nër rrugët e huaja. Sot përkulemi me një respekt të madh përpara trupit të shenjtë, e dikur do të përulemi përpara atij monumenti!”, ka cituar Kurti fjalët e Prishtinës.
Kryeministri i vendit ka shkruar se Hasan Prishtina duket që e ka parandjerë vrasjen e tij duke e cilësuar tutje atë si figurën më të kompletuar në historinë politike moderne të shqiptarëve.
“Me këto fjalë të Hasan Prishtinës për Luigj Gurakuqin, ku ai duket se e ka parandjerë edhe vrasjen e vetë atij, le ta kujtojmë këtë politikan aq autentik, patriot të paepur, artikulues i të drejtave të shqiptarëve dhe zë i tyre, prijës kryengritjesh për liri dhe lider largpamës. Vërtetë jetojmë në kohëra të tjera, por ai ende është një personalitet për t’u pasuar, sepse figura e Hasan Prishtinës është më e kulluara dhe më e kompletuara në historinë politike moderne të shqiptarëve!”, ka shkruar Kurti.
