Kryeministri Albin Kurti e ka quajtur triumf të drejtësisë, dënimin me burg të përjetshëm ndaj tre të akuzuarve të shpallur fajtorë për vrasjen e aktivistit kosovar Enver Hadrit.
Kurti nëpërmjet një postimi në Facebook ka thënë se drejtësia kompletohet nëse Serbia i dorëzon vrasësit te institucionet e Belgjikës, prej nga edhe u mor vendimi.
“Ky konfirmim i sistemit të drejtësisë së Belgjikës për dënimet paraprake me burgim të përjetshëm për vrasësit e Enver Hadrit, është një triumf i drejtësisë që për t’u kompletuar, do të duhej të pasohej nga bashkëpunimi i autoriteteve të Serbisë duke i dorëzuar këta tre vrasës te autoritetet e Belgjikës”, ka shkruar ai.
Kurti më tutje ka shprehur kurajën e tij për familjen e Hadrit, të cilët kanë kërkuar drejtësi në Gjykatën e Apelit në Bruksel.
“Fatkeqësisht, ashtu sikurse gjykimi fillestar edhe shqyrtimi i ankesave të dy nga tre të dënuarit, Veselin Vukotiq dhe Andrija Drashkoviq, u zhvillua në një proces gjyqësor në mungesë të tre të akuzuarve dhe të dënuarve, pasi që autoritetet e Serbisë kanë refuzuar t’i dorëzojnë ata te autoritetet e drejtësisë në Belgjikë. Të porositur nga shërbimi serb i zbulimit, Veselin Vukotiq, Andrija Drashkoviq dhe Bozhidar Spasiq, në bashkëkryerje kishin qenë pjesë e ekzekutimit të atentatit ndaj Enver Hadrit. Për përfshirje në vrasjen e Hadrit, kanë qenë të dyshuar edhe disa të tjerë, dy prej të cilëve qenë vrarë në konflikte mes grupesh kriminale serbe më vonë. Me këtë rast, për kurajon e tyre që të kërkojnë drejtësi në Gjykatën e Apelit në Bruksel, u shpreh konsideratat e mia familjes Hadri”, ka shkruar ai.
Aktivisti kosovar Enver Hadri u vra në mes të ditës në Bruksel, më 25 shkurt të vitit 1990, derisa ishte në timon të makinës së ndalur para semaforit të kuq.
Juria e Gjykatës së Apelit të Belgjikës ka konfirmuar dje në mbrëmje fajësinë për vrasësit e aktivistit kosovar Enver Hadri.
