Kryeministri i Kosovës, Albin Kurti, gjatë fjalës së tij në seancën plenare që po diskutohet për buxhetin e vitit 2025, ka folur edhe rreth Ligjit për Çmimet Tavan që u rrëzua nga Kushtetuesja dhe Ligjin për Pagën Minimale.
Kurti kritikoi opozitën dhe Gjykatën Kushtetuese, për këtë të fundit tha se më shpesh bën bilanc politik sesa që ndan drejtësi.
“Sic edhe e dini të nderuar deputetë, të dy ligjet deputetët opozitarë i bllokuan duke i dërguar në Gjykatën Kushtetuese. Eventualisht, Gjykata që më shpesh bën bilanc politik sesa që ndan drejtësi, njërin ligj na e rrëzoi, atë për çmimet tavan, kurse tjetrin e miratoi, atë për Pagën Minimale. Dëm gjithsesi. Për të parin se nuk hyri kurrë në fuqi, kurse për të dytin sepse u vonua 1 vit zbatimi i tij”, tha Kurti.
Mes tjerash, ai tha se LVV-ja gjatë qeverisjes përveç problemeve e krizave globale, është dashur të navigojë për sfidat dhe pengesat e brendshme.
“Pra qytetarë të dashur, përveç problemeve e krizave globale, neve na u desht edhe të navigonim për sfidat, pengesat e vonesat e brendshme që na u shkaktuan”.
Për fund, Kurti ftoi deputetët të votojnë pro projektligjit mbi ndarjet buxhetore për Buxhetin për vitin 2025, duke thënë se me këtë buxhet familja shihet si tërësi dhe njësi, ndërsa përfitime do të kenë edhe bizneset dhe ekonomia. /teve1.info/
