Kryeministri i Kosovës, Albin Kurti, ka mirëpritur arrestimin e Stefan Radulloviq, i dyshuar për përfshirje në sulmin terrorist në Banjskë të Zveçanit në shtator të vitit 2023.
Gjatë mbledhjes së Qeverisë, Kurti e cilësoi këtë zhvillim si një progres të rëndësishëm në drejtim të zbardhjes së plotë të rastit dhe vendosjes së drejtësisë për ngjarjen ku mbeti i vrarë rreshteri i Policisë së Kosovës, heroi Afrim Bunjaku.
Ai theksoi se sulmi në Banjskë kishte për qëllim destabilizimin e veriut të vendit dhe cenimin e rendit kushtetues, duke e cilësuar atë si një akt terrorist të organizuar.
Kurti shtoi se drejtësia nuk mund të konsiderohet e plotë pa vënien para përgjegjësisë të të gjithë të përfshirëve, përfshirë edhe Milan Radoiçiq, për të cilin tha se duhet të përballet me organet e drejtësisë në Kosovë së bashku me pjesëtarët e tjerë të grupit.
Sipas tij, institucionet e sigurisë dhe drejtësisë do të vazhdojnë përpjekjet për të siguruar që të gjithë përgjegjësit për këtë sulm të mbajnë përgjegjësi ligjore.
“Ky është një hap përpara dhe drejtësia bëhet e plotë vetëm kur bashkëpunëtor dhe kryeterroristi Milan Radoiçiq dhe grupi i tij në tërësi vihen para drejtësisë në Republikën e Kosovës”, tha Kurti. /teve1.info/
