Kryeministri Albin Kurti ka folur në Konferencën për Siguri Globale në Bratisllavë të Sllovakisë për situatën e fundit të krijuar në veri.
Kurti atje ka thënë që ndonëse kryetarët në veri nuk kanë legjitimet të plotë politik, procesin zgjedhor e njeh bashkësia ndërkombëtare.
“Ata janë kryetar bashkie me ‘u’ të vogël jo me ‘U’ të madhe sepse pjesëmarrja ishte e ulët, prandaj s’mund të konsideroj se kanë legjitimitet të plotë politik. Gjithsesi duhet të ekzistojë ligjshmëria dhe kushtetutshmëria. Ata janë kryetarët e komunave. Bashkësia ndërkombëtare e njeh procesin, rezultatet, por kur këta kryetar komunash do të duhej të shkonin në zyrë, në ndërtesat komunale që janë pronë e Republikës sonë, filluan të organizohen turma të dhunshme dhe u sulmuan policët tanë dhe ushtarët e NATO-s”, ka thënë Kurti, shkruan teve1.info.
Kryeministri Kurti ka shtuar se është normale të ketë policë prezent në komuna e sidomos pas organizimit të turmave të dhunshme, Kosova duhet t’i ketë atje njësitë speciale.
“Në çdo ndërtesë komunale ka nga pak deri në dhjetëra policë. Kjo është një situatë normale dhe mezi pres t’i kemi edhe në të katër komunat. Por përderisa jashtë është kjo turmë e dhunshme, që kërcënon se do të sulmojë, që bën grafiti me shkronjën “Z”, duke treguar admirim për presidentin despotik Putin dhe për pushtimin rus në Ukrainë dhe gjithashtu disa prej tyre që janë policë në Serbi, ne duhet të kemi njësitë tona speciale në ndërtesat e komunave”, deklaroi ai.
“Policia jonë është duke bërë një punë shumë profesionale, është e trajnuar nga perëndimi demokratik, është e orientuar nga perëndimi dhe nuk ka asnjë shkelje nga ana e policëve tanë. Unë kam dhënë udhëzim në këto komuna që zëvendëskryetarët të jenë serb dhe qeverisja lokale të jetë multietnike sepse diversiteti duhet të reflektohet”, shtoi ai.
