Kryeministri, Albin Kurti, ka shprehur ngushëllime pas tragjedisë që ka ndodhur në Koçan të Maqedonisë së Veriut.
Kurti të lënduarve iu ka shprehur shërim të shpejtë.
“Me pikëllim të thellë mësova për humbjen shkatërruese të 51 jetëve në Koçan të Maqedonisë së Veriut, si pasojë e një shpërthimi tragjik zjarri në një klub nate. Shpreh ngushëllimet e mia më të thella për familjet që humbën më të dashurit e tyre, si dhe për liderët dhe qeverinë e Republikës së Maqedonisë së Veriut dhe të gjithë vendit në këtë kohë pikëllimi. Të lënduarve u uroj shërim të shpejtë dhe të plotë”, ka shkruar Kurti.
Ministri i Brendshëm i Maqedonisë së Veriut, Pance Toshkovski, ka bërë të ditur se 51 persona kanë vdekur dhe mbi 100 janë lënduar si pasojë e zjarrit që ndodhi në orët e hershme të së dielës në Koçan.
Në konferencë për media ai ka thënë se ekipet mjekësore janë mobilizuar në gjithë vendin për t’u ofruar ndihmë mjekësore të lënduarve.
Zjarri thuhet se nisi si pasojë e fishekzjarrëve që u ndezën brenda diskotekës.
