Kryeministri i Kosovës, Albin Kurti, ka zhvilluar sot takimin e parë me Presidenten e re të Republikës së Kosovës, Justina Shiroka-Pula.
Takimi u zhvillua në Presidencë, ndërsa pas përfundimit të tij Kurti ka ndarë në rrjetin social Facebook disa detaje nga takimi dhe urimin që i ka bërë Presidentes së re. Takimi nisi rreth orës 11:00.
Kurti ka thënë se është “nder dhe kënaqësi” që Justina Shiroka-Pula është Presidente e Republikës së Kosovës, duke theksuar se e ka uruar për detyrën e re.
“Nder dhe kënaqësi ta kemi presidente të Republikës së Kosovës, profesoreshën Justina Shiroka Pula, dhe të zhvillojmë takimin tonë të parë në zyrën e saj të re.
E urova për detyrën dhe e falënderova që na gëzoi duke pranuar këtë përgjegjësi në një kohë kur vendi kishte shumë nevojë për president që, përveçse përbashkon e sjell stabilitet, ka integritet të lartë, dije të gjerë dhe përvojë të gjatë akademike e institucionale”, ka shkruar Kurti.
Kryeministri ka theksuar se institucionet do të bashkëpunojnë dhe bashkërendohen për çështjet në interes të qytetarëve dhe për prioritetet shtetërore.
“Do të bashkëpunojmë e do të bashkërendohemi për punët e mira për qytetarët dhe për prioritetet shtetërore”, ka shkruar ai.
Takimi i sotëm ishte kontakti i parë mes Kurtit dhe Shiroka-Pulës pas zgjedhjes së saj në krye të shtetit. Presidenca ka bërë të ditur se gjatë takimit Presidentja Shiroka-Pula shprehu gatishmërinë për bashkëpunim të ngushtë dhe bashkërendim ndërmjet institucioneve.
Justina Shiroka-Pula u zgjodh Presidente e Republikës së Kosovës më 7 tetor, ndërsa po atë ditë mori zyrtarisht detyrën pas ceremonisë së inaugurimit.
