Kryeministri në detyrë dhe lideri i LVV-së, Albin Kurti, ka reaguar pas shpalljes së rezultateve preliminare nga Komisioni Qendror i Zgjedhjeve.
Në deklaratën para mediave, Kurti theksoi se VV-ja ka shënuar rritje të dukshme, duke fituar në 7 komuna, krahasuar me 4 komuna në zgjedhjet e kaluara dhe vetëm 1 komunë në fillim të angazhimit të kësaj partie në nivel lokal.
“Përgëzoj kryetarët e komunave që kanë qeverisur – Podujevën, Shtimjen dhe Kamenicën – të cilave tani u janë bashkuar edhe Gjilani, Mitrovica, Fushë Kosova dhe Obiliqi”, tha Kurti.
Ai shtoi se ky është një sukses për Lëvizjen ndonëse pranoi se pritjet kanë qenë për një rezultat edhe më të lartë.
“Po presim ende rezultatet nga disa komuna të tjera dhe do t’u drejtohemi qytetarëve sërish. Tash po shkoj në tubimin festiv në Fushë Kosovë, pastaj në Kastriot dhe në Mitrovicë”, përfundoi Kurti. /teve1.info/
