Kryeministri i Kosovës, Albin Kurti ka falënderuar deputetët e Kuvendit që i kanë dhënë mbështetje këtij projektligji.
“Më në fund do të arrihet balanci ndërmjet anëtarëve të përzgjedhur prokurorë dhe atyre jo prokurorë. Në këtë mënyrë, ligji i ri do të zhvendosë diskutimin e takimeve të KPK-së nga interesat vetanake të prokurorëve, tek interesat që kanë në fokus fuqizimin e sistemit prokurorial, veprimin energjik të prokurorëve dhe aktakuzat e fuqishme të cilat nuk mundësojnë lirimin e kriminelëve me kusht por sigurojnë zbatimin e ligjit për kategori të tilla”, ka shkruar Kurti.
Kurti ka theksuar se përbërja e ardhshme e Këshillit Prokurorial ka përgjëgjsi të tregojë se nga reforma e filluar mund të kontribuojë dukshëm në fuqizimin e sundimit të ligjit të dëshmojë partneritet e bashkëpunim ndërinstitucional në çështjet e rëndësishme për vendin, duke mos tentuar të arsyetojë mosveprimin me pavarësi të sistemit gjyqësor por sipas tij, të dëshmojë pavarësinë në ushtrimin e detyrave të përcaktuara me ligj, shkruan teve1.info
“Projektligji i votuar sot do të ngritë pashmangshëm llogaridhënien dhe transparencën në sistemin prokurorial, veti këto të domosdoshme e aq të munguara brenda sistemit të drejtësisë”, ka shkruar Kurti.
“Ky është vetëm fillimi i reformës”, shtoi ai.
