Kandidati i Lëvizjes Vetëvendosje për kryeministër, Albin Kurti, ka akuzuar kandidatët e partive të tjera për kryeministër se po bëjnë premtime ekonomike pa asnjë mbulesë.
Sipas tij, ata po bëjnë premtime, siç i quajti ai, të rrejshme për rritje të pagave 50 për qind, pasi ‘e dinë se nuk do të testohen në ulësen e kryeministrit’.
Albin Kurti këto deklarata i bëri gjatë tubimit elektoral të Lëvizjes Vetëvendosje sonte në Suharekë.
“Të tjerët, për bindjen time të fuqishme, kanë premtime pa mbulesë. Ne kemi trend të vazhdueshëm. Realisht LVV-ja nuk ka nevojë as të premtojë, pasi ju po e jetoni trendin e zhvillimit ekonomik dhe shpërndarjes së mirëqenies, ndërkaq ata premtojnë pa mbulesë, thuajse ne nuk i njohim nga e kaluara. Tash thonë, për shembull, rritje të pagave 50 për qind, ndërsa kur ishin vetë ministra paga rritej 4 për qind. Kurse tash, kur nuk janë ministra, paga do të rritet 50 për qind. Por a e dini pse thonë se paga do të rritet 50 për qind, tjetra 90 për qind? Sepse e dinë se ata nuk kanë me u bë, pse mos me thonë. Ky është paradoksi i premtimeve të rrejshme. Premtimi i rrejshëm thuhet pa asnjë përgjegjësi dhe asnjë gajle, pasi s’ka me ardhur puna me u testuar kurrë. Kur dëgjoni dikë duke thënë se do t’i zvogëlojmë tatimet dhe do t’i rrisim shpenzimet, veç mendoni se kush i ka dhënë mësim ekonomi këtij personi ose ka ikë prej orës, nuk bën të përjashtohet. Pra, zvogëlo tatimet dhe rrite shpenzimet”, theksoi ai./teve1.info/
