Gjatë së mërkurës emisari Miroslav Lajcak, kishte edhe një takim me kryeministrin e Kosovës, Albin Kurti.
“Fillova ditën time në Davos me një diskutim të thelluar me kryeministrin Albin Kurti. Ne folëm për hapat e ardhshëm në dialog për normalizimin e marrëdhënieve dhe çështjet aktuale”,ka thënë Lajçak.
Ndërsa kryeministri Kurti, në një intervistë për gazetën zvicerane “Blick” tha se ai është optimist se brenda pak muajsh mund të arrihet një marrëveshje nëse ka vullnet edhe nga pala serbe për këtë gjë.
Ish-kryeministri i Kosovës Ramush Haradinaj, në një prononcim për tëvë1 tha se ka shpresë për arritjen e marrëveshjes, por kritikon pozicionin e Kurtit që po mbanë tash e një kohë në lidhje me dialogun.
“Nëse Kurti nuk ka problem me përmbajtjen e marrëveshjes, atëherë vërtetë është e pakuptimtë pse ka ndërmarr kaq lëvizje që e kanë hjek vëmendjen nga marrëveshja … unë besoj që ka mundësi me u arrit marrëveshja por jo duke vepruar njëanshëm dhe duke dal në taktika guerile ndaj aleatëve tonë të sigurisë siç ishte rasti me veriun”, ka thënë Haradinaj.
Ndërsa ish-ministri i Punëve të Jashtme, Enver Hoxhaj, thotë se me këtë qasje, Kurti nuk po arrin t’i bindë ndërkombëtarët se është serioz në këtë proces.
“Por ajo se çfarë po bënë kryeministri Kurti, komplet në mënyrë të gabuar është që nuk ka treguar vendosmëri, nuk ka treguar vizion, dhe nuk ka treguar qartësi se pse dialogu është i rëndësishëm për republikën e Kosovës dhe të paktën nuk ka mbërri që t’i bind partnerët tanë amerikanë dhe partnerët tanë evropian që qasja e tij është serioze”, tha Hoxhaj.
Ndërsa deputetja e LDK-së, Rrezarta Krasniqi, thotë se afatet e përmendura për dialogun duhet të zbatohen.
“Ne deri më tash kemi parë vetëm regres sa i përket dialogut, kemi parë që çdo gjë ka shkuar mbrapa. Shpresojmë që ato që i kanë thënë edhe ndërkombëtarët të jen ata muaj siç i kanë parapa ata edhe kryeministri edhe presidentja duhet t’i dëgjojnë akterët tanë ndërkombëtarë, sepse pa ta ne nuk do të ishim këtu ku jemi si shtet i lirë, demokratik dhe sovran”, tha ajo.
Për herë të parë afatet kohore për procesin e dialogut u përmenden në muajin nëntor të vitit që lamë pas, por të cilat nuk u konfirmuan nga BE-ja si lehtësuese e bisedimeve.
Kronika e gazetarit Valmir Gallopeni.
