Kuvendi ka hyrë në gjashtë ditët vendimtare për zgjedhjen e presidentit të ri.
Mirëpo, partitë politike assesi nuk janë duke ia dalë që ta gjejnë një zgjidhje.
Për këtë çështje ka folur sërish sot kryeministri Albin Kurti, duke propozuar që opozita të bëhet bashkë dhe ta ketë një kandidat jashtë skenës politike.
“Nëse do të bëheshin këto bashkë, do ta kishin një kandidat. Le t’i përdorin kriteret që i përdorin për neve: një kandidat jashtë skenës politike aktuale dhe le të ecim përpara. Mirëpo më shumë se kjo, çfarë mund të bëjmë? Ne duhet të qeverisim. Rezultatin e zgjedhjeve nuk e ndryshon dot”, u shpreh Kurti.
Kurti shtoi se LDK-së, sipas tij i bëri një ofertë mjaft të mirë.
“Partisë që i ka 15 deputetë, i kam ofruar të bëhet kryetari i tyre zëvendësi im, që i bie në mungesë time ai t’i udhëheqë mbledhjet e qeverisë. Dhe katër ministri. Pra, Lidhjes Demokratike të Kosovës unë i kam ofruar dyfish më shumë sesa partisë Guxo. Partia Guxo ka garuar bashkë me mua, e partisë që ka garuar kundër meje i kam ofruar dyfish më shumë. Katër ministri. Edhe u refuzua. U tha që nuk bën Vetëvendosja t’i ketë të tri pozitat, por ja pra s’po e kemi kryetarin e Kuvendit. Jo po Vetëvendosja nuk duhet ta ketë presidentin, po ma gjeni një njeri më të mirë se Glauk Konjufca që i ka mbi 318 mijë vota. Kur dikush thotë që nuk bën Vetëvendosja, është duke thënë nuk bën Glauku. Ju të gjithë e dini që opozita ka mendim më të mirë për Glaukun sesa për mua. Pse nuk e votojnë Glaukun? Ose nëse nuk e votojnë Glaukun, pse nuk propozuan asnjëherë ata ndonjë emër”, tha kryeministri.
Sipas tij, kritikat e opozitës nuk po e dëmtojnë Lëvizjen Vetëvendosje.
“Të gjitha këto zhurmat e piskamat që i dëgjoni me ankesa të paarsyeshme ndaj Lëvizjes Vetëvendosje nuk janë duke na bërë dëm neve, se ne prapë po mbërrijmë aty. Janë duke i bërë dëm shtetit, duke i humbur edhe buxhet, edhe kohë”, tha Kurti.
Për çështjen e Presidentit, ka folur gjatë ditës edhe Albulena Haxhiu, e cila që nga 4 prilli po e ushtron detyrën e Presidentes së vendit.
“Mendoj që mungesa dhe refuzimi i të gjitha propozimeve, ofertave që kryeministri Kurti i ka bëre në drejtim të partive opozitare, PDK-së dhe LDK-së, mendoj që nuk i ndihmon vendit. Ne nuk i frikësohemi zgjedhjeve, por mendoj që nuk ka të bëjë kjo me kush është më trim e kush është më i guximshëm, por a janë zgjedhjet në interes të qytetarëve. Ne mendojmë, unë personalisht mendoj, që nuk janë në interes të qytetarëve të Republikës së Kosovës”, tha Haxhiu.
Madje Haxhiu thotë se është e gatshme që ta dorëzoj edhe postin e saj, si kryetare e Kuvendit.
“Unë kam ofruar edhe pozitën e kryetares së Kuvendit, sepse çka më duhet pozita e kryetares së Kuvendit nëse dikush e kërkon këtë dhe nëse kjo e parandalon zgjedhjet e jashtëzakonshme”, u shpreh ajo.
Afati për zgjedhjen e presidentit sipas aktgjykimit të Gjykatës Kushtetuese është deri më 28 prill.
