Kryeministri i Kosovës, Albin Kurti i ka quajtur premtime boshe ato të opozitës dhe reagimet pas ngritjes premtimit për rritje të pagave.
Kurti ka thënë se këto premtime po vijnë si kundërvlerë e vendimeve të mira qeveritare.
“Për shkak se zgjedhjet tashmë po afrohen po dëgjojmë edhe shumë premtime boshe opozitare, si kundërvlerë e vendimeve të mira qeveritare. Mirëpo për një gjë duhet të jemi të sigurt, se emisionet humoristike dhe qeverisja e përgjegjshme nuk duhet të ngatërrohen”, ka thënë Kurti në mbledhjen e Qeverisë së Kosovës, ku është shqyrtuar ndarja buxhetore për vitin 2025.
Lidhja Demokratike e Kosovës dhe Aleanca për Ardhmërinë e Kosovës kanë premtuar se nga janari do të rrisë koeficientin për paga në 150 euro.
Edhe PDK ka thënë se rritja e premtuar nga Qeveria Kurti është e pamjaftueshme.
Kurti të martën tha se nga janari për gjithë punëtorët e sektorin publik paga do të rritet prej 55 euro, kurse nga korriku prej 110 euro.
