Një tjetër ngjarje e rëndësishme nacionale i ka nxjerr në pah raportet jo të mira mes dy liderëve shtetërorë.
Presidentja e vendit, Vjosa Osmani të mërkurën i ftoi kryetarët e partive parlamentare për të diskutuar rreth datës së zgjedhjeve të rregullta.
Mirëpo, në këtë takim nuk erdhi kreu i partisë më të madhe Lëvizjes Vetëvendosje, Albin Kurti.
E për mungesë të tij, Osmani tha se nuk i di arsyet edhe pse janë dakorduar më herët për datën.
“Të gjitha partitë kanë qenë të ftuara në nivel të kryetarëve. Nënkryetari i VV-së ka shprehur gatishmëri që të vijë në takim, mirëpo meqë ka qenë i informuar se ftesa ka qenë për kryetar këtë parim e kemi mbajtur për të gjithë. Ai me mirëkuptim e ka zbatuar. Sot, nuk ka qenë prezent kryetari i VV-së, Albin Kurti ne nuk i dimë arsyet, besoj mund ta pyesni drejtpërdrejt atë, po supozoj se është në zyrë. Kështu që mund të shkoni dhe ta pyesni”, u shpreh Osmani.
E pas takimit, e para e shtetit tregoi se janë propozuar katër data si mundësi për të qenë ditë e zgjedhjeve.
26 janari, 2 shkurti, 9 shkurti apo 16 shkurti do të jetë dita kur qytetarët e Kosovës do iu drejtohen kutive të votimit.
“Sipas ligjit janë katër data të mundshme për zgjedhje, e para është 26 janari, pastaj 2 shkurti, 9 ose i 16, meqenëse ligji ynë parasheh që vetëm të dielave të mbahen zgjedhjet. Prandaj, edhe diskutimi ynë ishte vetë në kontekst të këtyre katër datave. Nuk kishte ndonjë insistim të tepërt, kishte preferenca, sepse nuk është dallimi i madh po flasim për pak javë”, tha ajo.
E për Partinë Demokratike të Kosovës, 26 janari është data më e përshtatshme.
Sipas kreut të këtij subjekti, Memli Krasniqi, me qenë se nuk pati zgjedhje të parakohshme, data e parë është e vlefshme.
Për 26 janarin e vitit 2025, u pajtua edhe Lidhja Demokratike e Kosovës me Aleancën për Ardhmërinë e Kosovës.
Osmani tha se nga kryetarët e partive që ishin prezent nuk ka pasur propozime për zgjedhje të parakohshme.
Po ashtu para e vendit, Vjosa Osmani shtoi se caktimi i datës së zgjedhjeve të rregullta nuk nënkupton se nuk mundet të ketë zgjedhje të parakohshme, por theksoi se për një gjë të tillë nuk pa disponim nga partitë politike.
