Kryeministri i Kosovës, Albin Kurti, nuk ka pranuar ftesë nga Prokuroria e Shtetit, për rastin e vjedhjes së dëshmive të Astrit Deharit, nga Instituti i Mjekësisë Ligjore, raporton teve1.info
Lajmin për Teve1 e ka konfirmuar zëdhënësi i Qeverisë, Përparim Kryeziu.
“Nuk kemi pranuar një ftesë të tillë nga prokuroria”, i është përgjigjur Kryeziu pyetjes së Teve1.
Ndërkohë, avokati i familjes Dehari, Tomë Gashi, ka thënë përmes telefonit se Prokuroria nuk ka pse ta thërras Albin Kurtin në intervistë dhe se deklarimet e Haki Abazit janë fjalë të kota.
Deputeti i partisë në pushtet, Haki Abazi, javën e kaluar ka deklaruar se për rastin e vjedhjes së dëshmive në dhomën e Institutit të Mjekësisë Ligjore, duhet të merret në pyetje kryeministri Albin Kurti dhe ministrja e Drejtësisë, Albulena Haxhiu.
Edhe Flamur Pireva, këshilltar politik i ministres së Drejtësisë, Albulena Haxhiu, ka thënë për Teve1 se Haxhiu e ka dhënë dëshminë e saj dhe është e gatshme ta bëjë një gjë të tillë sa herë që kërkohet.
“Siç e dini, Ministrja Haxhiu e ka raportuar këtë rast ne Prokurori. Me 18 janar e ka dhënë dëshminë e saj. Për këtë ka njoftuar edhe publikisht e po ashtu, do te jete e gatshme për të dhënë dëshminë e saj sa here qe e kërkojnë institucionet”, ka thënë Pireva për Teve1.
