Kryeministri në detyrë, Albin Kurti njëherit kryetar i Lëvizjes Vetëvendosje ka vizituar fermerin Sadik Abiti në Pestovë të Vushtrrisë.
Ai ka thënë se ky fermer është një nga përfituesit e shumtë e të kënaqur të mbështetjes nga Ministria e Bujqësisë dhe qeveria.
Megjithatë ai ka thënë se fermerët në këtë komunë kanë nevojë edhe për mbështetje komunale e që sipas tij, nevojat e tyre janë prioritet i kandidatit të tyre për kryetar të Vushtrrisë, Sylejman Meholli.
“Sadiku është gjithashtu një nga fermerët e shumtë e të zotë të kësaj ane që, përpos përkrahjes nga niveli qendror, kanë nevojë edhe për kujdes dhe ndihmë nga komuna. Nevojat e tyre janë prioritete të kandidatit tonë për kryetar të ardhshëm të Vushtrrisë, Dr. Sylejman Meholli, i cili në program, ndër të tjera, ka mbrojtjen e kulturave bujqësore nga vërshimet përmes rregullimit të kanaleve kulluese dhe argjinaturave, funksionalizimin e Tregut të Gjelbër për prodhuesit vendor dhe programe e trajnime të avancuara për fermerët”, ka shkruar Kurti.
