Përmes një postimi në Facebook, Kurti ka bërë të ditur se në tetor do ta hapin aplikimin për shtesa edhe për fëmijët e lindur në vitin 2011, teksa ka shtuar se gradualisht do ta zgjerojnë skemën e shtesave për të përfshirë të gjitha gjeneratat deri në moshën 16 vjeçare, shkruan teve1.info
“Këtë muaj po bëhen një vit prej kur për herë të parë filluam skemën e Shtesave për Fëmijë dhe Shtesave për Lehona. Nga shtatori 2021 e deri më tani, nga këto dy skema kanë përfituar rreth 200 mijë fëmijë, mbi 20 mijë nëna të reja dhe dhjetëra mijëra familje të Republikës. Rishtazi hapëm aplikimin për fëmijët e lindur në vitin 2012, e në tetor do ta hapim edhe për fëmijët e lindur në vitin 2011. Kështu, gradualisht po zgjerojmë skemën e shtesave drejt synimit tonë për të përfshirë të gjitha gjeneratat deri në moshën 16 vjeçare”, ka shkruar Kurti.
Ai tha se shtesat për fëmijë dhe lehona janë dëshmi dhe sipas tij do të bëhen traditë e qeverisjes së tyre të mirë.
“Nuk ka kthim prapa shtatorit të vitit të kaluar. Shtesat për fëmijë dhe lehona janë dëshmi dhe do të bëhen traditë e qeverisjes së mirë. Të angazhuar që secila familje ta ndiej dorën e shtetit, do të vazhdojmë edhe më tej me politika që në qendër kanë ngritjen e mirëqenies për qytetarët tanë”, ka shkruar Kurti.
