Në këtë takim sipas komunikatës u bisedua për ecurinë e mëtejshme të procesit të bisedimeve në Bruksel, dhe për përgatitjet për takimet e radhës në kuadër të dialogut për normalizimin e plotë të marrëdhënieve ndërmjet Republikës së Kosovës dhe Serbisë.
“Kryeministri Kurti ritheksoi se Qeveria e Republikës së Kosovës mbetet e përkushtuar për kornizën e përgjithshme të marrëveshjes ligjërisht të obligueshme, marrëveshje kjo, e cila sjell normalizim të plotë, sepse e ka në qendër njohjen reciproke”, thuhet në komunikatë.
Në takim theksohet se u potencua “Raporti i Komisionit Evropian për Kosovën, i pranuar dje, si dukshëm më i mirë sesa vitin e kaluar dhe si një ndër raportet më të mira në rajon. U tha se ky raport tregon qartë përkushtimin e Qeverisë së Republikës së Kosovës për agjendën e BE-së dhe dëshmon arritjet e shënuara në shumë fusha, që kanë kaluar një hap më lart në shkallët e progresit”.
Po ashtu u bisedua për çështjet aktuale, si dhe domosdoshmërinë e zbatimit të marrëveshjes për energjinë, që përfundimisht shpie në pagesën e energjisë elektrike në pjesën veriore të Kosovës.
Nga ana tjetër, Lajçak në një deklarim për media pas takimit me Kurtin duke folur për marrëveshjen me energjinë ka thënë se kompanisë serbe mund t’i merret licenca për mosrespektim të afateve.
Ai njoftoi se të hënën do të jetë në Beograd./teve1.info/
Lexo edhe
https://teve1.info/lajmet/lajcak-ka-rrezik-ti-terhiqet-licenca-elektroseverit/
