Përmes një njoftimi për media nga zyra e Kryeministrit është bërë e ditur se Kurti ka thënë se luftimi i krimit dhe korrupsionit janë themeli i një rritje të qëndrueshme ekonomike që i duhet vendit, shkruan teve1.info
Gjatë takimit me Maloney, Kurti ka folur edhe për dialogun me Serbinë, me ç’rast ka theksuar se i njëjti duhet të jetë parimor.
“Ai theksoi angazhimin e Qeverisë dhe përparimin në luftimin e krimit dhe të korrupsionit, duke veçuar ngritjen e Kosovës për 17 vende sipas indeksit të perceptimit të korrupsionit të Transparency International, dhe renditjen si të parët në rajon sipas “World Justice Project”. Lidhur me dialogun me Serbinë, kryeministri ritheksoi se duhet të jetë dialog parimor që respekton barazinë e palëve në bisedime dhe që në qendër të marrëveshjes ka njohjen e ndërsjellë. Qeveria e Kosovës angazhohet dhe është e vendosur që kushtetutshmëria, integriteti territorial, sovraniteti dhe ligjshmëria të ngelen të pacenuara, tha kryeministri Kurti”, thuhet në njoftim.
Tutje, në njoftim theksohet se Kurti ka shprehur qëndrimin se qasja e Serbisë te fondet e SHBA-së duhet të kushtëzohet me dënimin e plotë të invazionit rus pas sulmit në Ukrainë.
“U diskutua edhe invazioni dhe agresioni rus në Ukrainë dhe rreziku që paraqet për destabilizimin e rajonit, marrë parasysh lidhjet e afërta të Rusisë me Serbinë, e cila për dallim nga Republika e Kosovës, nuk është rreshtuar me botën demokratike në dënimin dhe sanksionimin e agresorit. Kryeministri tha se qasja e Serbisë te fondet e Shteteve të Bashkuara të Amerikës duhet të kushtëzohet me dënimin e plotë të invazionit rus dhe sanksionimin e luftës ilegale të Rusisë në Ukrainë”, thuhet në njoftim.
Ndër të tjerash bëhet e ditur se kongresistja Maloney ka falënderuar kryeministrin Kurti që u rreshtuan përkrah ShBA-së dhe BE-së lidhur me invazionin rus në Ukrainë dhe për ndihmën e ofruar refugjatëve afganë. /Teve1.info/
