Kryeministri Albin Kurti ka udhëtuar për në Shtetet e Bashkuara të Amerikës në kuadër të Sesionit të 79-të të Asamblesë së Përgjithshme të Kombeve të Bashkuara. Sipas komunikatës së lëshuar nga zyra e kryeministrit, Kurti pritet të takohet me liderë nga bota ku do të diskutohet për anëtarësimin e Kosovës në organizata ndërkombëtare dhe do të bëhet prezantimi i mundësive dhe përparësive që Kosovës ofron për investitorë të huaj.
I pari i ekzekutivit të mërkurën mori rrugën për në Shtetet e Bashkuara të Amerikës.
Kryeministri i Kosovës, Albin Kurti, pritet të zhvillojë takime bilaterale me liderë nga bota.
E gjithë kjo pritet të ndodhë në kuadër të javës së nivelit të Lartë të Sesionit të 79-të të Asamblesë së Përgjithshme të Kombeve të Bashkuara.
Detaje për këtë vizitë të Kurtit së bashku me ministren e Punëve të Jashtme Donika Gërvalla në New York dhanë edhe nga zyra e kryeministrit.
“Përmes pjesëmarrjes në Javën e Nivelit të Lartë dhe takimeve të parapara synohet thellimi i raporteve bilaterale me vende partnere, fuqizimi i mëtejmë i subjektivitetit ndërkombëtar të shtetit tonë në raport me vendet mosnjohëse dhe anëtarësimin në organizata ndërkombëtare, dhe prezantimi i mundësive dhe përparësive që Republika e Kosovës ofron për investitorë të huaj”, thuhet nga Zyra e Kryeministrit.
Por profesori i shkencave politike thotë se në këtë vizitë, Kurti nuk do të ketë takime me administratën amerikane.
“Takimi i Kurtit në SHBA nuk ka të bëjë me qeverinë amerikane apo administratën amerikane, por ka të bëjë ekskluzivisht me takimet që do të bëhen brenda punës së Asamblesë së përgjithshme të Kombeve të Bashkuara. Është ftesa që e ka dërguar Josep Borell, për të gjithë liderët e Ballkanit Perëndimor, do të jetë një takim përmbyllës apo lamtumirës”, tha Dritëro Arifi.
Por takimet të cilat Kurti pritet të ketë me liderët e vendeve ndërkombëtare, sipas njohësit të rrethanave politike, Tomor Avdiu, Kurti duhet t’i shfrytëzojë edhe për rastin e Banjskës.
“Këto takime përbëjnë në vetvete edhe një qëllim të Qeverisë Kurti për të krijuar një lloj fryme edhe të bashkëpunimit, jo vetëm të Qeverisë por edhe të shtetit tonë në raport në atë çfarë na ka ndodhur neve kur jemi në përvjetorin e sulmit terrorrist të Banjskës, por bashkësia ndërkombëtare nuk ka ndonjë masë ndëshkuese ndaj Serbisë për këtë veprim që është kry. Besoj kryeministri dhe të tjerët do të kenë mundësi t’ua sqarojnë liderëve atje, këtë akt për të krijuar imazh me të saktë, se pasi u hap aktakuza për këtë rast, duhet të këtë ndëshkim për Serbinë”, shprehet Avdija.
Profesori i shkencave politike Dritëro Arifi thotë se aktualisht marrëdhëniet ndërmjet SHBA-së dhe Kosovës janë të acaruara.
“Administrata amerikane është irrituar nga veprimet e Qeverisë dhe kjo ka qenë ajo që acaruar gjithë marrëdhëniet, krejt gabimi i qëllimshëm apo i paqëllimshëm ka qenë tek në moskoordinim apo mos komunikimin e duhur, pra kjo e ka shkaktuar se jo që ka ndonjë shpërputhje të madhe ideologjike”, tha Arifi.
Gjatë qëndrimit në ShBA, i pari i ekzekutivit gjithashtu do të takojë pjesëtarë të komunitetit shqiptarë në SHBA dhe përfaqësues të shoqatave të diasporës atje.
Në fund të vizitës, kryeministri Kurti do mbajë ligjëratë në Universitetin prestigjioz Yale, mbi rrugëtimin demokratik të Republikës së Kosovës 25 vjet pas çlirimit.
