Kryeministri i Kosovës, Albin Kurti, është deklaruar për shtesat e rrezikshmërisë për policët, duke thënë se kanë bërë analiza të hollësishme para se të merrej vendimi.
Kryeministri deklaroi se gjatë muajit qershor e korrik, 10% e zyrtarëve të Policisë së Kosovës kanë pasur të ardhura më të larta se presidentja e Kosovës.
“Nuk mund të kemi zgjidhje partikulare, kemi bërë hulumtime dhe ju kemi treguar. Shtesa më e lartë për rrezikshmëri është 150 euro e më e ulëta 45 euro. Ju e dini që pare boll kurrë s’ka, por buxheti i Kosovës është ky që është. Po ua ritheksojë edhe njëherë afër 700 pjesëtarë të Policisë së Kosovës, që i bie 10% të tyre kanë pasur të ardhura mesatare më të lartë se presidentja”, tha kryeministri gjatë konferencës për media, raporton teve1.info
Tutje, ai tha se gjatë këtij viti mbi 2 mijë policë kanë pasur të ardhura mesatare më të larta se 1 mijë euro.
“Për gjatë këtij viti 2 mijë e 134 policë kanë pasur në Republikën e Kosovës të ardhura mesatare më të larta se 1 mijë euro, që i bie afër 27 për qind të policëve. Të ardhurat mesatare të policëve për këtë vit për 2 mijë e 134 kanë qenë më lartë se 1 mijë euro. Në qershor dhe korrik sivjet janë afër 700 policë, të cilët kanë marrë pagë me shtesa me të larta se presidentja e Republikës. Ndërkaq, mesatarja e të ardhura të policëve për 203 sosh, gjatë këtij viti është më e lartë sesa e presidentes së Republikës që është paga më e lartë në sektorin publik”, deklaroi Kurti./teve1.info/
