Kryeministri i Republikës së Kosovës, Albin Kurti, ka vizituar fshatin Korishë të Prizrenit, në 24-vjetorin e Masakrës që ka ndodhur në këtë vend nga forcat serbe.
Kurti gjatë homazheve në Memorialin e Martirëve zbuloi edhe shtatoren e heroit Sali Shabani.
Kurti përkujtoi civilët shqiptarë nga Korisha dhe fshatrat Budakovë, Reshtan, Bllacë, Mushtisht, Maçitevë dhe Greikoc, të vrarë në maj të vitit 1999.
“Jam këtu si kryeministër i Qeverisë së Republikës së Kosovës, jo vetëm thjeshtë të ndaj ndjesitë e përbashkëta për viktimat me familjarët e tyre dhe të gjithë të tjerët, por jam këtu sot në ditën e martirëve të Korishës, sidomos për të treguar që shteti i Kosovës do të kujdeset maksimalisht për trashëgiminë e luftës në Kosovë. Veçanërisht për ta njohur historinë e masakrave dhe të secilit krim e të secilit kriminel, si dhe për të denoncuar të gjitha hallkat e sistemit shtetëror të Serbisë”, tha Kurti.
Të pranishëm gjatë homazheve ishin edhe ministri i Mbrojtjes, Armend Mehaj, kryetari i Komisionit Qeveritar për personat e zhdukur, Andin Hoti dhe deputetë të Kuvendit. /teve1.info/
