Kryeministri i vendit, Albin Kurti ishte mbrëmë pjesë e darkës me liderët e shteteve të Ballkanit Perëndimor, me ftesë të homologut të tij nga Greqia, Kyriakos Mitsotakis.
Përmes një njoftimi nga Zyra e Kryeministrit bëhet e ditur se gjatë kësaj darke u diskutua për çështjet rajonale, teksa Kurti ka theksuar se të gjitha shtetet që duan të anëtarësohen në Bashkimin Evropian duhet ta zbatojnë demokracinë, sundimin e ligjit e fqinjësinë e mirë.
E sipas tij, kusht për fqinjësinë e mirë, është njohja reciproke, përcjell teve1.info
“Në intervenimin e tij, Kryeministri Kurti theksoi se të gjitha shtetet që aspirojnë anëtarësim në Bashkimin Evropian duhet të i përmbahen dhe zbatojnë demokracinë, sundimin e ligjit, respektimin e të drejtave të njeriut dhe fqinjësinë e mirë. E kusht për fqinjësinë e mirë është njohja reciproke, de-jure edhe de-facto. Minoritete do të ketë çdoherë, por kërkohet simetri dhe balancë në respektimin e minoriteteve bazuar në Konventën Kornizë për Mbrojtjen e Pakicave Kombëtare”, është shprehur Kurti, thuhet në komunikatë.
Po ashtu, gjatë kësaj darke joformale u diskutua edhe për agresionin rus në Ukrainë.
Teksa në fund të takimit u miratua edhe një deklaratë e përbashkët e cila bënë thirrje për ri-energjizimin dhe ri-fokusimin në procesin e zgjerimit për anëtarësim në BE, mbështetje të palëkundur për pavarësinë e Ukrainës, ndëshkimin e krimeve të kryera gjatë luftës dhe thirrjen për përgjegjësi ndaj kryerësve të krimeve.
Pjesë e këtij takimi ishin edhe kryetarja e Komisionit Evropian, Ursula von der Leyen, presidenti i Këshillit Evropian, Charles Michel, presidenti i Ukrainës, Volodymyr Zelenskyy, kryeministri i Kroacisë, Andrej Plenkovic, kryeministri i Rumanisë, Marcel Ciolacu, kryeministri i Bullgarisë, Nikolai Denkov, dhe presidentja e Moldavisë, Maia Sandu. /Teve1.info/
