Kryeministri në detyrë i Kosovës, Albin Kurti të mërkurën ka marrë pjesë në hapjen e edicionit të 16-të të Festivalit Ndërkombëtar të Domates, i cili mbahet tradicionalisht në Komunën e Mamushës.
Sipas Zyrës së Kryeministrit, në fjalën e tij, ai ka thënë se festivali është dëshmi e shpirtit të banorëve të zellshëm të Mamushës, një komunë relativisht e vogël në përmasë, por shembull bereqeti për bujqësinë e Kosovës.
“Vetëm përmes skemës së granteve fermerët e Mamushës kanë përfituar 7.5 milionë euro. Kjo përkrahje e jona e ka përmirësuar imazhin për bujqësinë e Kosovës dhe ka shtuar vullnetin te fermerët. Përkrahja do të vazhdojë të rritet sepse nevojat dhe kërkesa janë që prodhimet e Kosovës të jenë të mira, të shumta dhe cilësore”, është shprehur kryeministri në detyrë.
Tutje, Kurti ka premtuar se do të vazhdojnë ta mbështesin dhe ndihmojnë akoma më shumë Mamushën.
“Mamushën e kemi mbështetur dhe ndihmuar, por këtë do ta bëjmë edhe më shumë sepse Mamusha po punon gjithnjë e më shumë, po prodhon gjithnjë e më shumë, po eksporton gjithnjë e më shumë”, ka shtuar ai.
Sipas Kurtit, shifrat e dëshmojnë se eksporti i domates në vitin 2021 ka qenë më pak se 73 mijë euro dhe në vitin 2024 ka tejkaluar 11 milionë euro.
“Ky është rezultat i cilësisë së prodhimeve tona dhe i punës e i përkushtimit të fermerëve, ekspertëve dhe përkrahjes së vazhdueshme si të institucioneve tona dhe po ashtu edhe të atyre ndërkombëtare si USAID, TIKA, GIZ, ADA, CARITAS. Rritja e mbështetjes, e prodhimit dhe eksportit nënkupton rritje të ekonomisë dhe mirëqenies së fermerit, familjeve të tyre dhe të tjerëve hisedarë në zinxhirin e vlerës. Vetëm gjatë katër viteve të qeverisjes sonë 2021-2024, eksporti i perimeve është rritur për mbi 70%, nga 24 milionë euro sa ishte në periudhën 2017-2020, në 41 milionë euro në këto vitet e fundit”, ka theksuar Kurti.
