Kryeministri i Kosovës, Albin Kurti ka deklaruar në Barcelonë se vonesat në procesin e zgjerimit të Bashkimit Evropian krijojnë hapësirë për ndikime të jashtme dhe rrisin rreziqet gjeopolitike në rajon.
Në një fjalim gjatë një paneli në konferencën “Global Progressive Mobilisation”, Kurti theksoi se Ballkani Perëndimor nuk duhet të shihet si periferi e Evropës, por si pjesë e saj integrale në aspektin historik, kulturor dhe politik.
Ai ka vlerësuar se anëtarësimi në Bashkimin Evropian është jo vetëm aspiratë, por domosdoshmëri për forcimin e demokracisë, zhvillimit ekonomik dhe sigurisë afatgjatë në rajon dhe në kontinent.
Sipas Kurtit, procesi i ngadalshëm i integrimit evropian krijon hapësirë për aktorë të tjerë dhe sfida të reja gjeopolitike, ndaj kërkohet një qasje më e shpejtë dhe më e vendosur ndaj zgjerimit të BE-së.
“Si kryeministër i një vendi nga Ballkani Perëndimor siç është Republika e Kosovës, ndava bindjen se rajoni ynë nuk duhet të shihet si periferi e Evropës, por si pjesë integrale e saj, historikisht, kulturalisht dhe politikisht. Anëtarësimi në Bashkimin Evropian nuk është vetëm aspiratë, por nevojë për demokraci më të fortë, zhvillim ekonomik dhe siguri afatgjatë për të gjithë rajonin dhe vetë kontinentin”.
Kurti ka theksuar gjithashtu nevojën për reforma dhe bashkim më të madh mes vendeve evropiane për të garantuar siguri dhe progres të përbashkët.
