Kryeministri në detyrë i Kosovës, Albin Kurti, i shoqëruar nga bashkëpunëtorë, ka bërë homazhe dhe ka vendosur lule të freskëta në kompleksin në Marinë, në përvjetorin e rënies së Mujë Krasniqit, Beqir Gashit dhe 39 dëshmorëve të tjerë.
Në komunikatën e Zyrës së Kryeministrit, theksohet se Mujë Krasniqi, Komandant i Brigadës 113 në Zonën Operative të Drenicës, së bashku me 40 ushtarët e Ushtrisë Çlirimtare të Kosovës, ranë në pritë në Pashtrik, teksa po ktheheshin nga Shqipëria për në Kosovë.
“Të ngarkuar me armë dhe municione, ata u përballën me trupat serbe, duke luftuar në Likenet e Hasit, në Gorozhup të Pashtrikut. Lavdi jetës e veprës së Mujë Krasniqit, Beqir Gashit dhe gjithë ushtarëve të Ushtrisë Çlirimtare të Kosovës”, thuhet në komunikatë./teve1.info/
