Kryeministri në detyrë i Republikës së Kosovës, Albin Kurti, dhe ministri në detyrë i Financave, Punës dhe Transfereve, Hekuran Murati, kanë pritur në ndërtesën e Qeverisë një delegacion të Odës Ekonomike të Gjenevës, të kryesuar nga kryetari Vincent Subilia.
Delegacioni përbëhej nga përfaqësues të sektorëve të ndryshëm si arkitektura, menaxhimi i aseteve, pasuritë e paluajtshme, industria ushqimore, energjia dhe shërbimet juridike.
Gjatë takimit, anëtarët e Odës u njoftuan me trendet aktuale të zhvillimit ekonomik në Kosovë dhe me performancën makroekonomike të vendit. Kryeministri Kurti dhe ministri Murati theksuan se ekonomia e Kosovës ka shënuar një rritje mesatare vjetore prej 6% të Bruto Produktit Vendor (BPV) në katër vitet e fundit, ndërsa në tremujorin e parë të vitit 2025, rritja ishte 3.6%.
Po ashtu, u theksua se për herë të parë, Kosova ka marrë një vlerësim kreditor sovran nga agjencia ndërkombëtare Fitch Ratings, me notën BB-, e cila është rikonfirmuar edhe për vitin 2024.
Në vijim, pjesëmarrësit u informuan për avantazhet që ofron Kosova për investitorët e huaj, si kostoja e ulët operative, mosha e re e popullsisë, aftësia shumëgjuhëshe e fuqisë punëtore – veçanërisht në anglisht dhe gjermanisht – si dhe kapacitetet në sektorin e teknologjisë dhe inovacionit.
Një temë tjetër e rëndësishme ishte edhe roli i diasporës në zhvillimin ekonomik të vendit. U potencua se diaspora paraqet një potencial të madh për investime në sektorin prodhues, përmirësimin e eksporteve dhe forcimin e brendit kombëtar të Kosovës.
Në përfundim të takimit, u diskutuan mundësitë për bashkëpunim të mëtejshëm ekonomik dhe përfshirja e bizneseve të Odës Ekonomike të Gjenevës në sektorë specifikë në Kosovë.
