Kryeministri në detyrë i Kosovës, Albin Kurti, ka reaguar pas paralajmërimit të Bashkimit Evropian për heqjen e masave ndëshkuese të vendosura ndaj Kosovës.
Përmes një postimi në platformën “X”, Kurti ka theksuar se masat e BE-së kishin sanksionuar Kosovën padrejtësisht për përçarje të orkestruara nga Serbia.
Sipas tij, kjo axhendë ka çuar edhe në sulme të mëdha terroriste në territorin e Kosovës, përfshirë sulmin fatal në Banjskë dhe një tjetër në Ibër-Lepenc, që kishte në shënjestër infrastrukturën kritike.
Kurti ka theksuar se, pavarësisht këtyre masave, Kosova ka mbetur e përkushtuar ndaj Bashkimit Evropian dhe procesit të integrimit evropian, duke punuar vazhdimisht për përmbushjen e kritereve për anëtarësim dhe për të qenë aleate e besueshme e vlerave demokratike.
“Ne e mirëpresim vendimin e BE-së për të hequr masat e vendosura ndaj Kosovës. Qeveria jonë ka pohuar vazhdimisht se këto masa ishin të padrejta që nga fillimi, pasi ato sanksionuan Kosovën për përçarjet e orkestruara nga Serbia – një axhendë që çoi gjithashtu në sulme të shumta të mëdha terroriste në territorin tonë, duke përfshirë sulmin fatal në Banjska dhe një tjetër në Ibër-Lepenc që synonte infrastrukturën kritike. Gjatë gjithë kësaj periudhe, ne kemi mbetur plotësisht të përkushtuar ndaj Bashkimit Evropian, për përmbushjen e kritereve për anëtarësim dhe për të vazhduar si aleatë të përkushtuar dhe kampionë të vlerave demokratike”, ka shkruar Kurti.
Ndryshe, presidentja e Republikës së Kosovës, Vjosa Osmani, të mërkurën, pas Samitit BE–Ballkani Perëndimor në Bruksel, ka bërë të ditur se Bashkimi Evropian do t’i heqë të gjitha masat ndaj Kosovës në fund të janarit.
Osmani ka thënë se ka marrë konfirmim nga presidentja e Komisionit Evropian, Ursula von der Leyen, se masat do të hiqen tërësisht gjatë muajit janar.
“Gjatë bisedimeve intensive me partnerët tanë është marrë vendimi që të gjitha masat t’i hiqen Kosovës. Një pjesë e madhe e tyre hiqet sot, ndërsa pjesa tjetër në fund të janarit. Rrjedhimisht, edhe fondet do të zhbllokohen, një pjesë shumë e madhe menjëherë dhe pjesa tjetër në fund të janarit”, ka deklaruar Osmani./teve1.info/
