Ka një kohë që Albin Kurti qeverinë e udhëheq si kryeministër në detyrë.
E nga gjashtë gushti, cilësimi në detyrë, Albin Kurtit mund t’i hiqet.
Kjo në rast se Kuvendi ia del që t’i formoj institucionet e reja.
Vendimin e ushtrueses së detyrës së Presidentes, Albulena Haxhiu, që ta caktoj datën e seancën konstituive, Kurti e ka mirëpritur.
“Dy proceset pasuese zgjedhore të dyja të parakohshme në dhjetor e veçmas në qershor kanë qenë të evitueshme dhe të panevojshme”. Këtë deklarim, Kurti e bëri në mbledhjen e radhës të Qeverisë së Kosovës.
Këtu u miratuan disa propozim-vendime dhe nisma, dy nga to të rëndësishme në fushën e digjitalizimit.
Vendimi i parë lidhet me nismën për arritjen e një marrëveshjeje ndërkombëtare me Bashkimin Evropian për përfshirjen e Kosovës në zonën “EU Roam Like at Home”, që synon heqjen e tarifave të roaming-ut.
“Vendimi i sotëm hap rrugë për zhvillimin e negociatave dhe arritjen e marrëveshjes me Bashkimin Evropian, e cila do të mundësojë që qytetarët të komunikojnë pa kosto shtesë roaming-u në vendet e BE-së.”
Ministri në detyrë, Lulëzon Jagxhiu, bëri të ditur se vendimi i dytë ka të bëjë me ngritjen e kapaciteteve digjitale në administratën publike.
“Korniza e miratuar sot përcakton një model të unifikuar për zhvillimin e aftësive digjitale dhe synon që transformimi digjital të kuptohet si ndryshim institucional dhe profesional, e jo vetëm si investim në teknologji”, tha Jagxhiu.
Në mbledhje u miratua gjithashtu projekt-rregullorja për rekrutimin e zjarrfikësve.
Ministri në detyrë i Punëve të Brendshme, Xhelal Sveçla, tha se projekt-rregullorja është hartuar në kuadër të planit të akteve nënligjore për vitin 2026 dhe synon krijimin e një sistemi të unifikuar e transparent të rekrutimit të zjarrfikësve.
