Kryeministri Albin Kurti ka njoftuar se kabineti i ri qeveritar ka mbajtur mbledhjen përuruese dhe të parë të punës, ku janë ndërmarrë disa vendime financiare dhe institucionale.
Sipas tij, që në ditën e parë është miratuar buxheti për vitin 2026, si dhe lista e marrëveshjeve ndërkombëtare që prej kohësh presin ratifikimin në Kuvend dhe që, siç theksoi, disa prej tyre kanë edhe afat skadence.
Po ashtu, Qeveria ka aprovuar vendimin për t’i kërkuar Kuvendit zgjatjen e vlefshmërisë së Ligjit për Ndarje Buxhetore të vitit të kaluar edhe për muajin mars. Kjo, sipas Kurtit, bëhet me qëllim që të sigurohet ekzekutimi me kohë i pensioneve dhe pagave në sektorin publik, derisa komisionet parlamentare dhe deputetët e legjislaturës së dhjetë ta shqyrtojnë dhe miratojnë buxhetin për këtë vit.
Kurti ka rikujtuar se vitin e kaluar Kuvendi ishte shpërndarë pa u votuar buxheti i shtetit në vlerë prej 4 miliardë euro, Plani i Rritjes së Bashkimit Evropian në vlerë 882.6 milionë euro, si dhe tri marrëveshje me Bankën Botërore mbi 120 milionë euro, duke rrezikuar përfitimet nga këto instrumente financiare.
Ai ka theksuar se tash, me Kuvendin e konstituuar dhe Qeverinë e re në detyrë, ekziston mundësia për ratifikimin e këtyre marrëveshjeve ndërkombëtare.
