Kryetari i Partisë Demokratike të Kosovës, Bedri Hamza, i është përgjigjur me një letër kryeministrit në detyrë, Albin Kurti, duke e falënderuar për ftesën e re për takim, por duke riafirmuar qëndrimin e partisë për të mbetur në opozitë.
Në letrën drejtuar Kurtit, Hamza thekson se vendimi i PDK-së buron nga dallimet programore dhe konceptuale me Lëvizjen Vetëvendosje, duke bërë të ditur se ky pozicion i ishte shprehur edhe në takimin e zhvilluar më 10 korrik.
“Për shkak të dallimeve tona programore dhe konceptuale, Partia Demokratike e Kosovës do ta ushtrojë përgjegjësinë e saj në opozitë, brenda Kuvendit të Republikës së Kosovës. Aty do ta japim kontributin tonë për forcimin e demokracisë, mbrojtjen e interesit shtetëror dhe përfaqësimin e interesave të qytetarëve”, shkruan Hamza në letër.
Përveç konfirmimit të rolit opozitar të PDK-së, Hamza i ka bërë thirrje Kurtit që të ndërmarrë veprimet e nevojshme për përmbylljen e procesit të konstituimit të Kuvendit, duke iu referuar afatit të përcaktuar nga Gjykata Kushtetuese.
“Nga ju kërkojmë që sot, në përputhje me afatin e përcaktuar nga Aktgjykimi i Gjykatës Kushtetuese, të ndërmerrni hapat e nevojshëm për përmbylljen e konstituimit të Kuvendit dhe t’i hapet rrugë formimit të institucioneve të reja”.
Në përmbyllje të letrës, Hamza thekson se Partia Demokratike e Kosovës do të japë kontributin e saj në procesin e konstituimit të Kuvendit të Republikës së Kosovës.
Ndërkohë, deri tani nuk është bërë publik ndonjë njoftim zyrtar për mbajtjen e një seance gjatë ditës së sotme, pas ndërprerjes së seancës së djeshme, e cila përfundoi pa u konstituuar Kuvendi.
