Kryeministri aktual dhe i mandatuari edhe për një mandat nga Lëvizja Vetëvendosje, ka premtuar mbështetje për vajzat dhe gratë në punës, pavarësim financiar dhe arsim.
Ai përmes një postimi në Facebook, ka njoftuar se ka mbajtur takim me gra e vajza në lagjen më të madhe të Mitrovicës, në Iliridë.
“Në lagjen më të madhe të Mitrovicës, në Iliridë, u mirëpritëm nga shumë gra e vajza profesioniste. Mbështetjen e madhe për vajzat dhe gratë në punësim, pavarësim financiar, arsim, ndërmarrësi e shëndetësi, do ta rrisim edhe më shumë, përherë e më shumë”, ka shkruar Kurti.
Kurti ka thënë se gjatë qeverisjes së tyre kanë ngritur pjesëmarrjen e grave në administratë.
“Pjesëmarrjen e gruas në shoqëri ne e shohim si raport i marrëdhënies, ku gratë japin kontribut në zhvillimin e progresin tonë shoqëror, dhe njëkohësisht përfitojnë nga po ai zhvillim e progres. Gjatë qeverisjes sonë e kemi ngritur pjesëmarrjen e grave në administratën e shtetit ku tash ato përbëjnë gati gjysmën e stafit (konkretisht 46%), ndërkohë që përfaqësimi në borde dhe institucione të pavarura është në nivelin më të lartë ndonjëherë”, ka shkruar Kurti.
