Për të shënuar shtrirjen e infrastrukturës telekomunikuese brezgjerë në terë territorin e Kosovës, Kryeministri i Republikës së Kosovës, Albin Kurti, i shoqëruar nga ministrja e Ekonomisë, Artane Rizvanolli, vizitoi fshatin Herticë të Komunës së Podujevës.
Kurti tha se lidhja e fshatit të fundit në internet brezgjerë është një arritje e rëndësishme për vendin.
“Po realizojmë një objektiv kyç që ka të bëjë me një nga parimet kryesore të qeverisjes sonë, e që është gjithëpërfshirja. Në rrugëtimin tonë drejt digjitalizimit është me rëndësi që askush të mos mbetet prapa”, tha Kurti
Sipas komunikatës së Qeverisë, kryeministri theksoi se Qeveria po sigurohet që përfitimet nga digjitalizimi i gëzojnë të gjithë qytetarët pa dallim rajoni, gjinie, etnie, apo statusi ekonomik. Duke investuar në infrastrukturën brezgjerë, ne po i thyejmë barrierat dhe po sigurojmë që të gjithë qytetarët të kenë qasje të barabartë në botën digjitale, shtoi ai.
“Përtej digjitalizimit në qeveri, synohet mbështetja e ekonomisë digjitale, si faktor i rëndësishëm i rritjes ekonomike. Por, shtoi më tej ai, zhvillimi i qeverisjes dhe ekonomisë digjitale kërkon infrastrukturë e shkathtësi, dhe një ekosistem të gjerë inovacioni dhe se përmes programit të Ekonomisë Digjitale të Kosovës – KODE, me mbështetje të Bankës Botërore, Ministria e Ekonomisë është angazhuar në krijimin e këtyre parakushteve. Falë këtij programi, tashmë janë trajnuar mbi 400 të rinj e të reja në fusha të ndryshme të Teknologjisë së Informacionit dhe Komunikimit, përderisa deri në fund të programit ky numër do të arrij në 2,000. Gjithashtu është mundësuar lidhja në internet brezgjerë të 201 fshatrave, 107 shkollave dhe 43 ambulancave, që më parë nuk kanë pasur një lidhje të tillë”,u shpreh Kurti.
Ai theksoi se nga sot Kosova është vendi më i mbuluar me infrastrukturë brezgjerë – është kampione në regjion dhe e krahasueshme me shtetet e zhvilluara të Bashkimit Evropian për shtrirje dhe përdorim të internetit brezgjerë.
Duke folur për angazhimin e Qeverisë, Kryeministri Kurti theksoi se shpejti do ta inaugurojmë Parkun e Teknologjisë Digjitale në Bërnicë, i cili do të ofrojë një platformë të re të rëndësishme për zhvillimin dhe rritjen e industrisë së Teknologjisë së Informacionit dhe Komunikimit në Kosovë. Ky park është edhe një investim i Qeverisë në ekosistemin e inovacionit, krahas investimit të vazhdueshëm së bashku me qeverinë gjermane në Parkun e Inovacionit dhe të Trajnimeve në Prizren.
Në këtë ngjarje ishte i pranishëm edhe përfaqësuesi i kompanisë së Telkos,Ymer Kurtolli.
Ai foli për rëndësinë e këtij projekti, ku tha shkollave dhe institucionet publike të këtyre zonave do tu ofrohet internet pa pagesë shtesë për pesë vite
“Përfitues të këtij projekti janë të gjitha shkollat,shtëpitë e shëndetit dhe zyra tjera institucionale të këtyre zonave pa pagesë shtesë për pesë vitet e ardhshme. Interneti sot është bërë nevojë themeltare pa të cilin qytetarët dhe bizneset nuk paramendohet të punohet as në një kioskë të vogël. Padyshim ky projekt ka ndikuar në mirëqenien e së cilit banorë të këtyre zonave ku përveç qasje në informacion do të kenë qasje në shitje online apo punë nga shtëpia”, tha Kurtolli./teve1.info/
