Vullnet Bugaqku nga Instituti Demokratik i Kosovës (KDI) ka vlerësuar se vendimi i sotëm lidhur me Listën Serbe për moscertifikim është proceduralisht i pabazë.
Sipas tij, ky vendim do të rrëzohet nga PZAP-i.
“Proceduralisht vendimi i sotëm është i pabazë dhe si rrjedhojë çfarëdo ankese që mund të parashtrohet nga ana e subjektit politik – Lista Serbe, i njëjti me gjasë edhe do të rrëzohet nga PZAP-i dhe do të anulohet ky vendim i KQZ-së nga ana e Gjykatës Supreme”, tha ai në emisionin “Info Nata” në Tëvë1.
Ai theksoi se diskutimi në KQZ ishte më shumë politik sesa ligjor.
“Sot pati populizëm, deklarata politike më shumë sesa qëndrime parimore dhe qëndrime që janë të bazueshme edhe në legjislacionin në fuqi në Kosovë. Krejt ai lloj diskutimi që ishte në KQZ mbi këtë subjekt politik ishte më shumë për qëllime elektorale dhe shërbime të populizmit”, u shpreh ai.
