Kryeministri i Kosovës, ka thënë se Ali Lajçi do të kujtohet për veprimtarinë patriotike dhe angazhimin e tij të shtrirë në një periudhë mbi 45 vjet.
Kurti ka thënë se përveç si politikan Lajçi ka qenë njëri prej organizatorëve të protestave gjithë popullore kundër regjimit serb për çka ishte arrestuar.
Ish-kryetari i Pejës dhe deputeti i Kuvendit të Kosovës ka ndërruar jetë të dielën për çka Kurti u ka shprehur ngushëllime familjes dhe miqve të Lajçit.
Postimi i plotë i Kurtit:
I pikëlluar nga lajmi për vdekjen e Bacës Ali, politikanit Ali Lajçi!
I lindur më 3 janar të vitit 1955 në Malaj të Rugovës, Ali Lajçi ka qenë politikisht aktiv gjatë gjithë jetës së tij. Emri i Ali Lajçit haset herët, qysh mes emrave të organizatorëve të demonstratave studentore e popullore të vitit 1981, për çka ai u dënua nga regjimi i Jugosllavisë me 15 vite burgim. U lirua nga burgu në vitin 1991, por u arrestua sërish më 1993 për përfshirjen e tij në organizime të rezistencës së armatosur.
Pas luftës në Kosovë, Ali Lajçi ishte Kryetar i Komunës së Pejës mes viteve 2001 – 2007. Pas kësaj ai u zgjodh deputet në Kuvendin e Kosovës në disa legjislatura, ku ishte edhe një nga nënshkruesit e Deklaratës së Pavarësisë së Kosovës, më 17 shkurt të vitit 2008. Me Ali Lajçin më ka rënë të njihem dhe të punojmë së bashku sidomos në kohën sa ishte deputet i Lëvizjes VETËVENDOSJE! në Kuvendin e Kosovës. Ali Lajçi do të kujtohet për veprimtarinë patriotike dhe angazhimin e tij politik të shtrirë gjatë një periudhe mbi 45 vjeçare, si nga ata që e njohën dhe punuan me të, ashtu edhe nga historia moderne e Kosovës.
Ngushëllime familjes Lajçi, shokëve dhe bashkëpunëtorëve të Ali Lajçit për vdekjen e tij!
U kujtoftë gjithmonë!
