Kryeministri i Kosovës, Albin Kurti, ka përgëzuar lojtarët dhe tifozët e Shqipërisë në Euro 2024.
Ai ka thënë se futbollistët e kombëtares me paraqitjet e tyre dhanë përshtypjen si pjesëmarrës të rregullt, ndërsa tifozët sikur të ishin vendas.
Kurti në Facebook, ka thënë se Shqipëria luajti ndeshjen më të bukur të këtij kampionati deri më tani.
“Në fushën e blertë u duk sikur jemi pjesëmarrës të rregullt, e jashtë saj dhe në shkallët e stadiumeve sikur ishim vendas. Ishte vetëm pjesëmarrja e dytë në një kampionat evropian. Në fund, humbëm përballë Spanjës, tri herë kampione e Evropës dhe një herë kampione e Botës, dhe Italisë, dy herë kampione e Evropës e kampion në fuqi dhe katër herë kampione e Botës. Ndërkaq me Kroacinë, nënkampione e Botës në vitin 2018, barazuam në ndeshjen më të bukur të turneut deri më tani. Ky grup lojtarësh na bëri krenarë. E ardhmja është premtuese. Pritjet që kishim janë vetëm dëshmia më e fortë për standardin që kemi vënë”, ka shkruar Kurti.
Shqipëria është eliminuar nga Euro 2024, pas humbjes 1:0 nga Spanja në ndeshjen e fundit të grupit B.
