Kryeministri i Kosovës, Albin Kurti, tha se Asociacioni i Komunave të Kosovës me shumicë serbe kurrë nuk ka qenë më i kërkuar nga Serbia, derisa shtoi se si “Zajednicë” ka nisur edhe “Republika Serpska” mbi Bosnje e Hercegovinë, raporton teve1.info
Kurti këto deklarime i bëri gjatë homazheve tek pllaka përkujtimore e Mon Balajt dhe Arben Xheladinit në Sheshin “Skënderbeu” në Prishtinë, ku tha se me të drejtë u kundërshtua pako e Ahtisarit e propozuar tetë ditë para protestës së 10 shkurtit 2007.
“Ishim të pakënaqur sepse të bindur që Kosovës i takon shumë më tepër, që populli i Kosovës kërkon shumë më shumë dhe padrejtësitë e reja nuk i lejojmë. Dhjetëra-mijëra protestuan në atë kohë e ballë tyre ishte Adem Demaçi. 232 plumba u shkrepën nga policia e UNMIK-ut në një situatë ku asgjë nuk shihej prej gazit lotsjellës. Mon Balaj e Arben Xheladini u vranë dhe 13 demonstrues të tjerë u plagosën rëndë e lehtë. 6 javë pas saj Ahtisari e shtoi rekomandimin për pavarësi të mbikëqyrur si faqe të parë të propozimit të tij”, tha Kurti.
Ai tha se Serbia po synon krijimin e Asociacionit me shumicë serbe sikur ajo në Bosnje e Hercegovinë.
“Kurrë nuk ka qenë më e diskutueshme nëse ia kanë vlejtur komunat mbi baza etnike, prandaj Beogradi kërkon asociacion të tyre. Si Zajednicë pat nisur edhe Republika Serpska mbi Bosnje e Hercegovinë. Jam i bindur që këtë nuk e duan serbët e Kosovës por këtë e don Serbia. Kosova ka nevojë për më shumë demokraci. Serbia është në panik. E padrejtë dhe e gabueshme, e dëmshme dhe e papranueshme”, u shpreh kurti.
Kurti tha se kjo është e dëmshme dhe e papranueshme.
