Kryeministri i Kosovës, Albin Kurti, nga Kuvendi i Kosovës ka deklaruar se opozita nuk mund ta zhbëjë vullnetin e qytetarëve dhe se po pengon funksionimin normal të institucioneve.
Ai tha se kanë kaluar katër muaj nga zgjedhjet e fundit dhe, sipas tij, opozita po kërkon sërish zgjedhje pa pranuar përgjegjësi qeverisëse.
“Sot janë mbushur 4 muaj nga zgjedhjet e fundit në Kosovë dhe ja ku jemi në një seancë që bojkotohet nga opozita. Vetëm 4 muaj pas zgjedhjeve duan prapë zgjedhje; ata nuk duan përgjegjësi, nuk duan pushtet. Pas një qeverisjeje 5-vjeçare është rritur mbështetja për ne. Ne do të jemi pranë popullit, duke i shërbyer me përkushtim, profesionalizëm e dinjitet dhe mbështetja për ne vetëm do të rritet,” ka thënë Kurti.
Ai shtoi se demokracia kërkon edhe institucione funksionale dhe kujtoi bllokadat e mëhershme në Kuvend.
“Por demokracia do edhe institucione. Vitin e kaluar ishte pengesa për t’u zgjedhur kryetari i Kuvendit dhe qeveria, ndërsa tash janë kapur te zgjedhja e presidentit,” u shpreh ai.
Kurti theksoi se Lëvizja Vetëvendosje ka bërë oferta të gjera për bashkëpunim pas zgjedhjeve, por sipas tij ato janë refuzuar nga opozita.
“Ne kemi qenë jashtëzakonisht gjenerozë në ofertat tona. Lidhjes Demokratike të Kosovës i kemi ofruar zëvendëskryeministrin dhe Ministrinë e Punëve të Jashtme dhe Diasporës për kreun e tyre, si dhe katër ministri të tjera, pa pasur nevojë fare për ta në qeveri. I kemi marrë në qeveri pavarësisht se s’na nevojiten,” tha Kurti.
Ai shtoi se edhe për çështjen e kryetarit të Kuvendit është propozuar një zgjidhje kompromisi.
“Thamë: ‘Urdhëroni, nënkryetari juaj ose kryetari juaj le të bëhet kryetar kuvendi, e Glauk Konjufca të bëhet nënkryetar i Kuvendit’. Thanë: ‘Nuk e pranojmë, sepse ju e dëshironi presidentin me çdo kusht’,” deklaroi ai.
Kurti tha gjithashtu se, sipas tij, Kosova praktikisht e ka presidentin, por mungon konstruktiviteti i opozitës për ta formalizuar procesin.
“Republika e Kosovës praktikisht e ka presidentin, por nuk e ka konstruktivitetin elementar të opozitës për këtë gjë,” u shpreh ai.
Ai përmendi edhe një emër të propozuar nga shoqëria civile, duke thënë se është vlerë që individë të tillë shprehin gatishmëri për angazhim publik.
“Feride Rushiti është e gatshme dhe gatishmëria e saj është nder. Unë e falënderoj që, si lidere e shoqërisë civile, ka pranuar të kandidohet,” tha Kurti.
Në fund, kryeministri theksoi se zgjidhja e situatës kërkon një opozitë të re, sipas tij më konstruktive.
“Por Kosova, për të pasur president të ri, duhet të ketë opozitë të re. Opozita zanatin dhe karakterin e ka të vjetër, prandaj janë në rënie të lirë; sa më shpesh që bëhen zgjedhje, aq më poshtë shkojnë,” deklaroi Kurti.
