Kryeministri i Kosovës, Albin Kurti, ka kërkuar mbështetjen e Irlandës për anëtarësimin në Këshillin e Evropës, presidencën e së cilës e kryeson Irlanda.
Ai këtë e ka kërkuar në një takim që ka zhvilluar me ambasadorin jorezident të Irlandës për Kosovë në Budapest, Ronan Gargan.
“Irlanda tani ka Presidencën e Këshillit të Evropës dhe kryeministri Kurti theksoi mbështetjen, që i duhet Kosovës për anëtarësim të suksesshëm në këtë organizatë tejet të rëndësishme për promovimin e të drejtave të njeriut, lirisë dhe demokracisë në kontinentin tonë”, thuhet në komunikatën e Qeverisë.
Ambasadori sipas komunikatës duke e uruar kryeministrin për progresin në ekonomi dhe në indikatorët e demokracisë, e falënderoi për rreshtimin me Bashkimin Evropian në dënimin e agresionit të pajustifikuar dhe të paprovokuar të Rusisë në Ukrainë dhe për vendosjen e sanksioneve ndaj Rusisë.
“Ambasadori po ashtu njoftoi për ardhjen për vizitë në Kosovë të ministrit irlandez për Çështje Evropiane, Thomas Byrne, më 4 korrik”, thuhet në komunikatë./teve1.info/
