Kryeministri në detyrë i Kosovës, Albin Kurti ka deklaruar se institucionet e Kosovës janë në komunikim të vazhdueshëm me KFOR-in lidhur me hapjen e plotë të urës kryesore mbi lumin Ibër në Mitrovicë.
Kurti bëri të ditur se gjatë ditës së sotme do të zhvillojë një takim me komandantin e KFOR-it, gjeneralmajorin Özkan Ulutaş, ku pritet të diskutohet edhe çështja e urës.
“Sa i përket itinerarit për hapjen e plotë të urës, përkatësisht marrjen nën kontroll tërësisht nga ana e Policisë së Kosovës, ne jemi në komunikim të vazhdueshëm me KFOR-in”, tha Kurti.
Ai theksoi se komunikimi mes Kryeministrisë, Ministrisë së Punëve të Brendshme dhe KFOR-it po zhvillohet në baza të përditshme, me synimin që procesi të realizohet në mënyrë të qetë dhe paqësore.
Kurti tha se mbajtja e urës kryesore të mbyllur është bërë, sipas tij, një situatë absurde pas ndërtimit të urave të reja në Mitrovicë.
Ai vlerësoi se qarkullimi i lirë i qytetarëve dhe mallrave është i dobishëm jo vetëm për ekonominë, por edhe për ruajtjen e paqes dhe sigurisë.
“Fakti që qytetarët kanë qarkulluar lirshëm nëpër ato ura të reja dhe nuk ka shtim as të incidenteve, as të tensioneve, tregon që qarkullimi i njerëzve dhe i mallrave, liria gjithnjë e më e madhe e lëvizjes është e dobishme jo vetëm për ekonominë, por edhe për paqen e sigurinë”, u shpreh Kurti në konferencë për media./teve1.info/
