Sipas tij, në një Kosovë me të cilën testet e PISA-s po e nxjerr 3/4 e fëmijëve si analfabetë funksionalë, “ta shantazhosh qeverinë është papërgjegjësi absolute”.
Kurti në një konferencë për media tha se nuk shantazhohen nga askush pasi shteti nuk krijohet nga shantazhet.
Ai shtoi se nuk mund të takohet me sindikalistët, meqë sipas tij është rregull që të takohet me kreun e BSKPK-së, Atdhe Hykollin.
“Nëse kryetari i BSPK-së thotë se nuk jam më kryetar unë e takoj kryetarin. Si kryeministër unë e takoj kryetarin e BSPK-së. Ai është zgjedhur në një kongres të BSPK-së, të cilët më kanë ftuar edhe mua. E kam për detyrë dhe bindje që ta takoj kreun e BSPK-së. Greva është instrument legjitim sindikal, por hapi i fundit jo i pari. 50 eurot që do t’i japim për punëtorët publik nga muaji shtator për këtë vit në muajt fiskalë”.
“Kjo s’ka të bëjë me ligjin për paga që do ta sjellim në Kuvend. Kjo është për përballje me inflacionin, jo për ligjin e pagave. Kërkesa absurde e 100 eurove në arsim deri te projektligji i pagave, është bërë që të krijohet projektligji do të kemi edhe më shumë se kaq. Me një Kosovë me të cilën testet e PISA-s po na nxjerrin 3/4 e fëmijëve si analfabetë funksionalë ta shantazosh qeverinë është papërgjegjësi absolute. Ne nuk shantazhohemi”.
Ai u bëri thirrje mësimdhënësve të kthehen në shkollë të hënën tjetër, por shton se nuk mungon komunikimi i qeverisë me përfaqësuesit e sindikatave, por racionaliteti i kërkesave.
“Kam hall për këto kërkesa që bëhen në mënyrë delirante”, tha Kurti.
“Ta bojkotosh shtetin do të thotë ta bojkotosh shtetin. Kemi bërë luftë për shkollë e ta bojkotojmë atë me greva ekstremiste. Iu bëj thirrje që të hënën të jenë në shkollë dhe t’u japin mësim të vegjëlve tanë. Jemi për mësimdhënësit, por edhe për nxënësit. Unë kam takuar disa herë kreun e BSPK-së, zotëri Atdhe Hykollin me bashkëpunëtorë ndërkaq ministrat e mi kanë takuar degës sindikale të BSPK-së”.
“Nëse duan të kenë shtet, duhet të ketë ligj. Unë jam për sindikata, për sindikata të fuqishme edhe në sektorin privat jo vetëm publik. Kërkesat absurde irracionale, që më shumë janë dëshira arbitrare se sa mundësi reale, nuk mund të ecim përpara. Në përputhje me buxhetin e shtetit, krizën ekonomike ne do t’i marrim masat tona”.