Kryeministri i Kosovës, Albin Kurti, i ka vlerësuar se zgjedhjet e ardhshme në Bashkimin Evropian janë të një rëndësie për të ardhmen e unionin, rajonit dhe procesin e zgjerimit.
Ai këtë e ka thënë në një takim me rrjetin socialdemokrat Miqtë e Ballkanit Perëndimor (Friends of Western Balkans).
“Kryeministri theksoi rëndësinë e këtyre zgjedhjeve për të ardhmen e Bashkimit Evropian dhe rrjedhimisht të rajonit dhe të procesit të zgjerimit. Sot tre vite pas fillimit të Qeverisë së tij, Kryeministri paraqiti arritjet e saj sociale, ekonomike dhe demokratike, dhe gjithashtu sfidat që mbeten në rrugën e Kosovës dhe të rajonit drejt integrimit evropian”, thuhet në komunikatë.
Rrjeti Miqtë e Ballkanit Perëndimor përbërë nga fondacione, eurodeputetë dhe deputetë të vendeve anëtarë të Bashkimit Evropian, por edhe nga partnerë të partive dhe shoqatave të rajonit.
Rrjeti u mblodh sot në Prishtinë ku biseduan për çështje të ndryshme, përfshirë zhvillimet në rajon apo edhe zgjedhjet evropiane të 9 qershorit.
Kryeministri shfrytëzoi rastin për të shprehur mirënjohjen e tij për mbështetjen e vazhdueshme të socialdemokratëve gjatë këtyre tre viteve, veçanërisht në Parlamentin Evropian, si dhe për anëtarësimin e Kosovës në Këshillin e Evropës dhe pranë institucioneve të Bashkimit Evropian, për të fituar liberalizimin e vizave, ndërsa Kosova kërkon sot dhe marrjen e statusit të vendit kandidat për anëtarësim në BE, thuhet në komunikatë.
