Kryeministri, Albin Kurti ndihet i trishtuar pas ngjarjes tragjike, ku tre persona kanë mbetur të vdekur, pasditen e sotme në fshatin Rufc të Lipjanit.
Ai tha se përtej rrethanave që do të sqarohen nga autoritetet, tronditje të tilla lënë boshllëk në zemrat e secilit prej nesh.
“I trishtuar pamasë nga lajmi i kobshëm për vdekjen tragjike të tre antarëve të familjes Bekteshi nga fshati Rufc i Vjetër i Komunës së Lipjanit. Përtej rrethanave që do të sqarohen nga autoritetet, tronditje të tilla lënë boshllëk në zemrat e secilit prej nesh. Sot, jemi pranë familjarëve e miqve të viktimave.Familjes Bekteshi i shpreh ngushëllimet më të sinqerta për humbjen e madhe, sikurse edhe të gjithë qytetarëve të Komunës së Lipjanit”, ka shkruar Kurti.
Ndryshe, tre të vrarët janë anëtarë të së njëjtës familje, kështu ka bërë të ditur për teve1.info, zëdhënësja e Prokurorisë, Laureta Ulaj.
Dyshohet që kryefamiljari ka vrarë bashkëshorten dhe djalin, e më pas ka qëlluar edhe veten.
Në lidhje me ngjarjen, Ulaj tha se prokurorja kujdestare nga Departamenti i Krimeve të Rënda ka dalë në vendin e ngjarjes dhe bashkë me njësitë relevante janë duke i ndërmarrë të gjitha veprimet hetimore me qëllim të ndriçimit të rrethanave të këtij rasti.
Sipas saj, nga informatat nga vendi i ngjarjes dyshimet çojnë drejt vrasjes së dy viktimave nga arma e zjarrit, si dhe një vetëvrasjeje./teve1.info/
