Kryeministri në detyrë, Albin Kurti ka deklaruar se në takimin e së shtunës me kryetarin e Nismës Socialdemokrate, Fatmir Limaj, ka bërë një ofertë konkrete për bashkëqeverisje me këtë parti.
Mirëpo, Kurti ka refuzuar të jap detaje për përmbajtjen e kësaj oferte, duke thënë se për hollësitë e saj do të flas vetëm kur ajo të finalizohet.
“Në takimin me Limajn kemi diskutuar për zhvillimet në Kosovë. Ne si parti fituese kemi shprehur interesimin për të bashkëqeverisur me Nismën Socialdemokrate dhe në përputhje me këtë unë kam bërë pak a shumë kam bërë edhe një ofertë konkrete për Nismën në mënyrë që gjithçka të përmbyllet sa më shpejtë dhe sa më mirë dhe ta kemi konstituimin e Kuvendit dhe gjithashtu edhe qeverinë e re. Mirëpo, kur këto bisedime të përmbyllen me rezultatin final, atëherë do të mund të flasim për hollësitë e përmbajtjes së saj”, ka thënë ai në një konferencë për media.
Tutje, ai ka paralajmëruar se lajmi për arritjen ose jo të marrëveshjes me Nismën Socialdemokrate do të bëhet i ditur këtë fundjavë.
“Nuk e di çfarë do të ndodhë pas 30 ditëve. Ndërkohë ne duhet të qeverisim sepse i kemi kompetencat e kufizuara, por punët i kemi të shumta. Unë kam bërë një ofertë për Nismën dhe nuk do të mund t’i diskutojë elementet përbërëse para se të finalizohen ato biseda sepse punoj që kjo të bëhet në këtë fundjavë. Në këtë fundjavë ose do ta kemi lajmin për marrëveshjen e arritur ose do ta kemi lajmin për mungesën e saj”, është shprehur Kurti.
